8 Noyabr Azərbaycan xalqının milli birliyinin, əzminin, qəhrəmanlığının və Vətən sevgisinin təntənəsidir. Bu əlamətdar gün xalqımızın yaddaşına əbədi həkk olunmuş tarixi Qələbənin rəmzi kimi qeyd edilir.
2020-ci il sentyabrın 27-də başlayan və 44 gün davam edən Vətən müharibəsi Azərbaycan tarixində yeni bir dövrün başlanğıcını qoydu. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu böyük qəhrəmanlıq və peşəkarlıq nümayiş etdirərək torpaqlarımızın azadlığı uğrunda mübarizə apardı.
8 noyabr 2020-ci il tarixində Şuşa şəhərinin işğaldan azad edilməsi Vətən müharibəsinin ən mühüm tarixi hadisələrindən biri oldu. Qarabağın tacı hesab edilən Şuşanın azad olunması Azərbaycanın hərb tarixinə misilsiz qəhrəmanlıq nümunəsi kimi yazıldı. Məhz bu tarixi hadisənin əhəmiyyəti nəzərə alınaraq, Azərbaycan Respublikası Prezidentinin 3 dekabr 2020-ci il tarixli Sərəncamı ilə 8 Noyabr Zəfər Günü elan edildi.
Zəfər Günü yalnız hərbi Qələbənin deyil, həm də milli həmrəyliyin, dövlətçilik iradəsinin və xalqımızın sarsılmaz Vətən sevgisinin təcəssümüdür. Bu Qələbə şəhidlərimizin canı, qazilərimizin sağlamlığı, əsgər və zabitlərimizin fədakarlığı bahasına qazanılıb. Bu gün azad edilmiş torpaqlarımızda həyata keçirilən genişmiqyaslı quruculuq və bərpa işləri Zəfərin davamı, gələcəyə yönəlmiş inkişafın göstəricisidir. Yenidən qurulan şəhərlər, kəndlər, yollar, infrastruktur və yaşayış məntəqələri Azərbaycanın quruculuq əzmini nümayiş etdirir.
Coordinat Group MMC olaraq Vətənimizin azadlığı və ərazi bütövlüyü uğrunda canlarından keçmiş bütün şəhidlərimizi dərin ehtiram və minnətdarlıqla yad edirik. Qazilərimizə möhkəm cansağlığı, xalqımıza daim sülh, əmin-amanlıq və firavanlıq arzulayırıq.
